`S Elektrische Liacht

Ein Gedicht (gekürzt) erschienen in der PNP am 07. Februar 1921. Autor unbekannt.

`S Elektrische Liacht

S`elektrische Liacht, da is gar koa Red,
Dös is fei was Schöns, aber brenna tuats net.
Um fünfi auf d` Nacht, da leuchts wunderhell,
A halbe Stund später is furt wieda schnell,
Drahst afi, drahtst abi, drahst wist und drahst hott,
Es laft halt koa Strom zu uns rauf durch`n Draht.
Grad foppm tuats oan, bald brinnts, bald net,
Bald glüahts bloß a bißl, es is halt a Gfrett!
Zündst Kerzn na o, is Liacht a wieda da,
Löscht Kernz wieda aus, geht's s`Liacht a wieda a.
Um zehni auf d`Nacht, wenn im Bett san dö Leut,
Da brennts na so schö, dass grad is a Freud!
Ja, s`elektrische Liacht, da is gar koa Red,
Dös is fei was Schöns, aber brenna tuats net!

Beim Setze drom, da hockens beiannanda auf d`Nacht,
Und schaffkopfa deans, daß alles wackelt und kracht.
Der Biermaia schreit auf oamal: Jetzt hab i an Tu
Und wiara dös sagt, is s`Liacht a weg im Nu.
Und bis wieda kimmt, werfens Kartn durchanand,
Und eam packts voll Wuat, schmeißts oni an d`Wand.
A Tu mit 8 Ober, zwanzg Markl hätts tragn,
I kannt glei dös Liacht von der Deck abischlagn!
Ja, s`elektrische Liacht, da is gar koa Red,
Dös is fei was Schöns, aber brenna tuats net!

Da Bua wart aufs Deandl beim Köchling sein Haus,
Da muaß ja vorbei, da kimmts eahm net aus.
Er stellt sie ans Eck, jetzt schloapfts scho daher,
Auf oamal geht's Liacht aus - is dös koa Malär!
Jetzt springt er schnell vüri und nimmts an sein Arm
Und gibt eahm an Schmatz, recht schö safti und warm.-
Na schreit er: Pfui Teifi, dös schmeckt aber schlecht,
Da kimmt wieda s`Liacht, jetzt kennt er si aus:
D` Xandlön is, o Jammer und Graus!
Na wischt er sö`s Maul a und schleicht si davo:
Du Sauliacht, du dammisch, kriagst mi a nimma dro.
Ja, s`elektrische Liacht, da is gar koa Red,
Dös is fei was Schöns, aber brenna tuats net!

An Wirt drom sei Dirn, dö geht aussi in Stall,
Draht`s elektrische Liacht auf, da is hell überall.
Jetzt sitzt`s scho aufn Schamml bei der Kuah dort hint
Und zipfelt, und zipfelt, bis d` Milch abirinnt.
Auf oamal is finster, s` Elektrisch geht aus,
Dö Kuah is daschrocka und schlagt hintn naus,
Da Schamml fallt um und d`Kathl rutscht mit
Und d`Milch wird ihr grad übers Gsicht abigschütt.
Und Kuah voller Angst hat an Mist a no gmacht,
Und grad auf si aufi, mir gangst guate Nacht!
Ja, s`elektrische Liacht, da is gar koa Red,
Dös is fei was Schöns, aber brenna tuats net!

Und ös kinnts mas nöt glaub`n und i kann`s enk net sagn
Was ma Aerger und Zorn mit dem Liacht muaß vatragn.
Und nacha, bis d`umschaust, is s`Monat scho rum,
Na dearfst schö brav zahln und woaßt net warum.
Und s`Oel und dö Kerzn, dö genga no drei,
Der Teifi solls holn bis in d`Höll mit nei!
Und balst nacha schimpfst, na machen`s da weis:
Im Sommer zweng Wasser, im Winter z`viel Eis!
So hoaßts. Ko scho sei! I moa aber so:
Es hänga halt sauber z`viel Häuser scho dro!
Schau wennst am Wagn auflegst, daß sö d`Axn scho biagn,
Na ko halt dei Roß dö Gschicht a nimma ziagn!
Drum sag i halt nomal: da is gar koa Red,
Schö is scho, s`Elektrisch, aber brenna tuats net!

 

Stichpunkte:
Elektrisches Licht

---

Quellen:
PNP

---

Artikel bearbeiten/neu Kommentar/Info senden